Sumarstarfsmenn klasans
Íslenski sjávarklasinn hefur nú ráðið átta unga námsmenn í sumar til að sinna hinum ýmsu verkefnum á vegum klasans en alls bárust 87 umsóknir. Við viljum bjóða hópinn velkominn til starfa og jafnframt kynna fyrir ykkur teymið sem mun starfa með okkur í sumar. Þau eru:
Arnar Jónsson, Brynja Björg Halldórsdóttir, Einar Smárason, Haukur Már Gestsson, Heiðdís Skarphéðinsdóttir, Jón Guðjónsson, Sigfús Ólafur Guðmundsson og Sigurður Logi Snæland. Öll hafa þau misjafnan og fjölbreyttan bakgrunn, þar á meðal hagfræði, lögfræði, sjávarútvegsfræði, verkfræði og viðskiptafræði en þau koma úr Háskóla Íslands, Háskólanum í Reykjavík og Háskólanum á Akureyri.
Arnar og Sigfús vinna að stofnun fullvinnsluverksmiðjunnar Codland. Að baki verksmiðjunnar stendur klasi fyrirtækja í fullvinnslu á þorski ásamt öðrum sjávarafurðum og verður verðmætaaukning, þekking og þróun höfð að leiðarljósi.
Jón og Haukur vinna að gerð skýrslu sem ber vinnuheitið X thousand tons into the dustbin/sea in the North-Atlantic. Markmið skýrslunnar er að festa hendur á það magn þorsks sem fer til spillis árlega í Norður-Atlantshafi. Í því samhengi verður nýting aukaafurða kortlögð, þ.e. það magn sem fer í framleiðslu og það magn sem fer í urðun.
Sigurður og Brynja eru í hafna- og skipaflutningadeild klasans. Þeirra helstu verkefni verða kortlagning á skipakomum til landsins og efling samstarfs flutningsfyrirtækja til aukninnar innlendrar framleiðslu. Þau vinna einnig að samþættri markaðssetningu íslenskra tænifyrirtækja sem ber heitið Græna fiskiskipið.
Einar og Heiðdís eru að vinna í því að efla menntun, áhuga og skilning á haftengdri starfsemi. Farið verður í menntaátak á vegum sjávarklasans sem felur í sér að markaðssetja námsframboð og kynna þá fjölmörgu möguleika sem eru í boði fyrir haftengda starfsemi. Markvisst verður unnið að eflingu meðvitundar og áhuga á sjávarútvegi hjá nemendum í 10. bekk í grunnskólum, framhaldsskólanemum og háskólanemum.
Efri frá vinstri: Bjarni, Haukur og Sigurður. / Neðri frá vinstri: Friðrik, Jón, Heiðdís, Brynja, Sindri og Einar. Á myndina vantar Arnar og Sigfús
